На чуткі пра тое, што ваеннаабавязаным беларусам будуць выдаваць бальнічныя толькі пасля рашэння кансіліуму, адрэагаваў набліжаны да Брэсцкага аблвыканкама тэлеграм-канал «1 регион».
Выданне падкрэсліла, што для ваеннаабавязаных экспертыза часовай непрацаздольнасці ажыццяўляецца доктарам сумесна з загадчыкам аддзялення з наступнай выдачай лістка непрацаздольнасці пры наяўнасці паказанняў.
У спрэчных выпадках цягам 5−10 хвілін збіраецца медыцынскі кансіліум, які прымае сумеснае рашэнне.
«Па-другое, такая практыка прымяняецца ў першым рэгіёне (Брэсцкай вобласці. — Заўв. рэд.) больш за 10 гадоў. Чаму ў некаторых рэсурсах вырашылі разагнаць гэтую тэму менавіта цяпер, не зусім зразумела. Па-трэцяе, кансіліум для сумеснага прыняцця рашэння пры пытанні аб выдачы лістка непрацаздольнасці, можа ініцыявацца доктарам у дачыненні да любога пацыента і ў іншы час», — паведаміў тэлеграм-канал «1 рэгіён».
Нагадаем, 10 красавіка тэлеграм-канал «Белые халаты» апублікаваў распараджэнне Галоўнага ўпраўлення па ахове здароўя Брэсцкага аблвыканкама галоўным дактарам медустановаў рэгіёна. У дакуменце паведамлялася, што на даручэнне Генштаба Узброеных сіл дактарам «неабходна ўзмацніць кантроль за выдачай лісткоў непрацаздольнасці, абгрунтаванасцю шпіталізацыі пры звароце ваеннаабавязаных грамадзян са скаргамі на стан здароўя». Такія рашэнні медыкам рэкамендавалася прымаць камісійна — кансіліумам дактароў-спецыялістаў.