Кіроўца-міжнароднік з Гомеля Яўген Пагарцаў, які падчас працы ў Расіі перанёс інсульт, памёр у бальніцы ў Екацярынбургу. Пра гэта парталу «Праўда Гомель» расказала яго дачка Яўгенія.
Пасля інсульту, у выніку якога 62-гадовы гамяльчук Яўген Пагарцаў трапіў у бальніцу ў расійскім Екацярынбургу, яму тэрмінова зрабілі аперацыю. Нейкі час мужчына прабыў у коме, быў падключаны да апарата штучнай вентыляцыі лёгкіх. Дактары працягвалі змагацца за жыццё беларуса, аднак 17 жніўня сваякам паведамілі пра яго смерць.
Як расказала дачка мужчыны Яўгенія, транспартная фірма Dentro, дзе ён працаваў, пагадзілася аплаціць транспартаванне цела дальнабойшчыка на самалёце ў Беларусь. Органы сацыяльнай абароны Гомельшчыны паабяцалі магчымую дапамогу блізкім загінулага.
Нагадаем, Яўген Пагарцаў працаваў кіроўцам-міжнароднікам у расійскай транспартнай кампаніі Dentro, ён выконваў рэйс з Масквы ў Екацярынбург. Падчас разгрузкі яму зрабілася кепска, мужчына перанёс інсульт і быў дастаўлены ў мясцовую гарадскую бальніцу.
Медыкі паведамілі пра тое, што здарылася, яго дачцэ Яўгеніі, якая разам з мужам тэрмінова выправілася на Урал, пераадолеўшы 2500 кіламетраў. На месцы сям’я даведалася, што стан у Яўгена Аляксандравіча стабільна цяжкі, ён знаходзіцца ў рэанімацыі.
Паводле словаў гамяльчанкі, перад рэйсам у яе бацькі павысіўся ціск, але яго ўсё роўна адправілі працаваць. Пры гэтым беларус у 62 гады не праходзіў ніякіх медыцынскіх абследаванняў, хоць працадаўца мусіў забяспечыць сацыяльнае страхаванне (медстрахоўку, бальнічныя лісты і іншае).